प्यूठान । । नेकपा एमालेका पोलिट्ब्युरो सदस्य एवं प्युठान जिल्ला इन्चार्ज सूर्य थापा चुनाव केन्द्रीत अभियानमा सक्रिय छन् । प्यूठानको झिमरूक गाउँपालिका वडा नंवर १ मा जन्मेका थापा यहाँ लामो समयदेखि निर्वाचन क्षेत्रमा पार्टीका चुनावी गतिविधिमा सहभागी छन् । निर्वाचनमा पार्टीलाई जिताउन र संगठन बलियो बनाउन पार्टी कार्यक्रम बनाएर उनी निरन्तर प्यूठानका घर गाउँमा पुगिरहेका हुन।
एमाले प्यूठानबाट प्रतिनिधिसभा तथा प्रदेश सभा सदस्यका लागि सर्वसम्मत रुपमा उम्मेदवार टुंगाईसकेको छ । प्रतिनिधिसभा तर्फ एमालेका ‘अलराउन्डर’ युवा नेता सूर्य थापा, प्रदेश ‘क’ मा तुल्सीराम शर्मा र प्रदेश ‘ख’ मा हरि प्रसाद रिजालको नाम सर्वसम्मत रुपमा सिफारीस भएको छ ।जिल्लामा दिनहुँ हुने विभिन्न पार्टी कार्यक्रममा प्यूठान इन्चार्ज तथा प्रतिनिधिसभा सदस्य पदका उम्मेदवार सूर्य थापा सहितका नेता पुग्ने गरेका छन् । उनीहरुले आगामी मंसिर ४ गते हुने निर्वाचनमा विगतमा एमालेले देशव्यापी रुपमा गरेको विकासका काम,आगामी दिनका लक्ष्य र पार्टीका एजेन्डालाई मतदातामाझ पुर्याउन कार्यकर्तालाई निर्देशन दिएका छन् ।
पार्टीका नेता कार्यकर्ता समेत उत्साहित भएर संगठन निर्माण तथा परिचालनमा लागेको एमाले प्युठानले जनाएको छ ।
निर्वाचन लक्षित कार्यक्रम तथा योजना बनाउनका लागि पार्टीले जिल्ला कमिटी, प्रदेश क्षेत्रीय कमिटी, विभिन्न विभाग, जनसंगठन कमिटी लगायतको बैठक तथा भेला गर्दै आएको छ।
जिल्लाका सवै स्थानीय तहको पालिका कमिटीको बैठक बस्न थालेका छन् ।
प्यूठानमा विभिन्न पार्टी छाडेर धेरै नेता/कार्यकर्ता एमालेमा गोलबन्द भएको बताउदै यो क्रम अझै जारी रहने पोलिटव्यूरो सदस्य तथा प्यूठान इन्चार्ज थापाले बताउनुभयो ।
असाेज ७ गतेदेखि एमालेले जिल्ला, प्रदेश र पालिका तहमा बैठक, भेला र अभिमुखीकरण कार्यक्रमलाई तीब्रता दिएको छ। यसै क्रममा ९ गते नौबहिनीकाे बाहनेबाट थालिएको पालिकास्तरीय निर्वाचन तयारीकाे अभियान १५ गते ऐरावतिमा पुगेर सम्पन्न गरिनेछ। यस अभियानले पार्टीलाई निर्वाचनको तयारीमा एकजुट, सक्रिय र याेजनाबद्द रूपमा अघि बढाउन महत्त्वपूर्ण याेगदान गर्ने अपेक्षा रहेको छ।
