७ कात्तिक, काठमाण्डौ ।
आज धनधान्य, ऐश्वर्य र सम्पन्नताकी प्रतीक लक्ष्मीको पूजा आराधना गरी श्रद्धा भक्तिपूर्वक लक्ष्मी पूजा मनाइँदैछ । बिहानै घरमा सफा सुग्घर पारी गाईको गोबरले लिपपोत गरेपछि दीपावली गरेर लक्ष्मीलाई बोलाउने गरिन्छ । लक्ष्मी पूजा र दिपावली गरिने कार्तिक कृष्ण औँसीको रातलाई सुखरात्री पनि भनिन्छ । आज बेलुका लक्ष्मी पूजाका लागि चामलको पीठो र अबिरले लक्ष्मीको पाइला बनाइ लक्ष्मी आउने बाटो बनाईन्छ र घरका झ्याल, ढोका, कोठा आदीमा दीपावली गरिन्छ।
दीपावली गरिसकेपछि पूजा कोठामा दियो, कलश र गणेशसहित लक्ष्मी स्थापना गरेर गरगहना, पैसा, धान, चामल, फलफूल, सेलरोटी र फूलमाला चढाइ विधिपूर्वक लक्ष्मीको पूजा आराधना गरिन्छ । आज घरमा लक्ष्मीपूजा गरेपछि धनदौलत वा अन्य सामान कसैलाई दिइ वा बाहिर पठाए लक्ष्मी बाहिर जान्छिन् भन्ने धार्मिक विश्वास छ । आज बेलुकाबाट देउीभैलो समेत खेल्ने सुरु गरिन्छ ।
