भैरहवा ।
नेपाल टेलिकम रुपन्देही सुपर लिग क्रिकेट प्रतियोगिता अन्तर्गत डिभिजन ‘बी’को आज बुधबारकोे खेलमा बुटवल राइनोज विजयी बनेको छ । प्रोफेसनल मास्टर्स–११ लाई २ विकेटले पराजित गर्दै बुटवल राइनोजले जीत निकालेको हो। भैरहवास्थित सिद्धार्थ क्रिकेट रंगशालामा टस जितेर पहिला ब्याटिङ गरेको मास्टर्स–११ ले निर्धारित ५० ओभरको खेलमा ३२.४ ओभरमा सबै विकेटको नोक्सानीमा १ सय ४५ रनको मध्यमस्तरको योगफल बनाएको थियो ।
१ सय ४६ रनको लक्ष्य पछ्याएको बुटवल राइनोजले ४० ओभरमा ८ विकेटको क्षतिमा लक्ष्य भेट्टाएको थियो । बुटवल राइनोजका अलदिप कुंवर म्यान अफ द म्याच भई एक हजार रुपैयाँ प्राप्त गरेका छन । रुपन्देही क्रिकेट संघको आयोजनामा जारी प्रतियोगिता चैत ३ गतेसम्म चल्नेछ । प्रतियोगितामा ए डिभिजनका ८ र बी डिभिजनका १२ गरी २० टीमको सहभागीता छ । प्रतियोगितामा बिजेताले १ लाख रुपैयाँ र ट्रफी तथा उपबिजेताले ५० हजार र ट्रफी प्राप्त गर्नेछन् ।
