भैरहवा ।
रुपन्देही क्रिकेट संघको आयोजनामा भैरहवास्थित सिद्धार्थ क्रिकेट रंगशालामा जारी नेपाल टेलिकम रुपन्देही सुपर लिग क्रिकेट प्रक्रियोगिता अन्तर्गत डिभिजन ‘बी’को शुक्रबारकोे खेलमा बुटवल राइनोजले लुम्बिनी शाक्यानलाई १ सय ४३ रनको फराकिलो अन्तरले पराजित गरेको छ । जितसँगै बुटवल डिभिजन ‘ए’ मा प्रवेश गरेको छ । टस जितेर पहिला ब्याटिङ गरेको बुटवलले निर्धारित ५० ओभरको खेलमा ९ विकेटको नोक्सानीमा २ सय १३ रनको योगफल बनायो । जवाफी ब्याटिङ गरेको लुम्बिनी २२।२ ओभरमा सबै विकेट गुमाउँदै ७० रनमै समेटियो ।
उसलाई सस्तैमा रोक्न बलिङमा बुटवलका शिव कुँवरले ५.२ ओभर बलिङ गर्दै १ मेर्डन राखेर २२ रन खर्चेर ५ विकेट लिए । खेलमा बुटवलका सुरज सारु मगर म्यान अफ द म्याच भई एक हजार रुपैयाँ प्राप्त गरे । चैत ३ गतेसम्म चल्ने प्रतियोगितामा ए डिभिजनका ८ र बी डिभिजनका १२ गरी २० टीमको सहभागिता छ । प्रतियोगितामा विजेताले १ लाख रुपैयाँ र ट्रफी तथा उपविजेताले ५० हजार र ट्रफी प्राप्त गर्नेछन् ।
