काठमाण्डौ ।
ढाकाकुमार श्रेष्ठको सांसद पद तत्कालका लागि निलम्बन नगर्न अदालतले अल्पकालीन अन्तरिम आदेश जारी गरेको छ। राष्ट्रिय स्वतन्त्र पार्टी (रास्वपा)ले कारबाही गरेका सांसद ढाकाकुमार श्रेष्ठले दायर गरेको मुद्दामा सर्वोच्च अदालतले अल्पकालीन अन्तरिम आदेश जारी गरेसँगै उहाँको सांसद पद तत्कालका लागि निलम्बनमा नपर्ने भएको हो । आफूलाई गैरकानुनी ढङ्गले निलम्बन गरेको भन्दै श्रेष्ठले रिट निवेदन दिनुभएको थियो ।
सोही रिटमाथि आज (सोमवार) सुनुवाइ गर्दै न्यायाधीश तिलप्रसाद श्रेष्ठको एकल इजलासले सांसद श्रेष्ठलाई कारबाही गर्नुको कारण माग गर्दै अल्पकालीन अन्तरिम आदेश जारी गरेको सर्वोच्च अदालतले जनाएको छ । आफूलाई मन्त्री बन्ने प्रस्ताव आएको र त्यसका लागि पार्टीलाई पैसा बुझाउनुपर्ने भन्दै श्रेष्ठले व्यवसायी दुर्गा प्रसाईँसँग दुई करोड रुपैयाँ मागेको अडियो बाहिरिएपछि राष्ट्रिय स्वतन्त्र पार्टीले श्रेष्ठलाई सांसदबाट निलम्बन गर्न संसद् सचिवालयलाई सिफारिस गरेको थियो ।
