एजेन्सी ।
मुम्बई ट्राफिक प्रहरीले अमिताभ बच्चन र अनुष्का शर्मालाई मोटरसाइकल चढाउने चालकलाई जरिवाना तोकेको छ ।
वास्तवमा केही दिन अघि मात्र अमिताभ बच्चनले एउटा तस्बिर शेयर गरेका थिए जसमा उनी एक बाइक चालकसँग लिफ्ट लिएर कतै जाँदै गरेको देखिन्छ । यो तस्बिरमा अमिताभ र बाइक चालक दुवैले हेलमेट लगाएका थिएनन् । त्यसपछि सामाजिक सञ्जालमा बलिउड अभिनेत्री अनुष्का शर्माको एउटा भिडियो पनि शेयर भएको थियो, जसमा उनी बाइकमा सवारसँग बसेको देखिएकी थिइन् । दुवैमा समानता यो थियो कि दुवैले हेलमेट लगाएका थिएनन् । जसका कारण दुवै स्टार सामाजिक सञ्जाल प्रयोगकर्ताको निशानामा परे । मानिसहरूले मुम्बई पुलिसलाई ट्याग गरेर यो कुरा उठाएका थिए ।
एक वरिष्ठ प्रहरी अधिकारीलाई उद्धृत गर्दै समाचार एजेन्सी पिटिआईले भन्यो, ‘अमिताभ र अनुष्का दुई जनामाथि हेलमेट बिना मुम्बईको सडकमा घुमेका कारण, उनीहरूलाई बाइकमा सवारी गराउने व्यक्तिमार्फत् जरिवाना लगाइएको छ ।’ मुम्बई ट्राफिक पुलिसले ट्विटरमा दुवै सवारीका चालकहरूलाई जारी गरिएको चलानीको प्रतिलिपि पनि साझा गरेको छ । प्रहरी अधिकारीले पीटीआईलाई दिएको जानकारीमा सोसल मिडिया प्रयोगकर्ताहरूको गुनासोलाई ध्यानमा राख्दै, प्रहरीले मोटरसाइकल चालकलाई चलानी जारी गर्यो र १० हजार ५०० रुपैयाँको जरिवाना लगाए ।
