एजेन्सी ।
आदिपुरुष फिल्मले रिलिज भएको दुई दिनमै विश्वभर २४० करोड भारुको व्यापार गरेको छ । तेस्रो दिनको तथ्याङ्क भने आउन सकेको छैन । तर बक्स अफिसमा फिल्मको पहिलो दुई दिनको ट्रेन्ड कायम रहेमा तीन दिनमै फिल्मले सहजै ३ सय करोडको आँकडा पार गर्नेछ । यो कमाई त्यति बेला भइरहेको छ जब यो फिल्मलाई समीक्षकहरूले राम्रो मूल्याङ्कन गरिरहेका छैनन् र सामाजिक सञ्जालमा पनि यो ट्रोल भइरहेको छ ।
पहिलो दुई दिनको कमाइलाई हेर्दा बलिउडका लागि यो नयाँ रेकर्ड हो । बलिउडको बक्स अफिसमा अहिलेसम्मकै सर्वाधिक कमाई गर्ने फिल्म ‘पठान’ ले पहिलो दुई दिनमा १२७ करोडको व्यापार गरेको थियो । यो आँकडा हेर्दा आदिपुरुष धेरै अगाडि देखिन्छ । चलचित्र समीक्षक र दर्शकको आलोचना र डाइलगको भाषाको विवादका बाबजुद पनि मानिसहरू हलमा पुगेका छन् । बढ्दो विवादका बीच आइतबार फिल्मका निर्माताले फिल्मबाट विवादित संवाद हटाएर नयाँ संवाद ल्याउने वाचा गरेका छन् ।
