एजेन्सी । जुड बेलिङह्यामले रियल मड्रिडको करियरमा आफ्नो उत्कृष्ट सुरुवातलाई कायम राख्दै शनिबार ओसासुनालाई हराउने क्रममा दुई गोल गर्न सफल भएका छन् । योसँगै २० वर्षीय खेलाडीले रियलका लागि सबै प्रतियोगिताका १० खेलमा १० गोल गर्न सफल भएका हुन् ।
गोलडटकमका अनुसार बेलिङह्यामले सुरुवाती १० खेलमा क्रिस्टियानो रोनाल्डोले रियलका लागि गोलमा गरेको योगदानको रेकर्ड पनि तोडेका छन् । बेलिङह्यामले १० खेलमा रियलका लागि गोलमा १३ वटा योगदान दिएका छन् । पोर्चुगिज महान् खेलाडीले भने यति नै खेलमा ११ वटा गोलका लागि योगदान दिएका थिए ।
खेलको नवौँ मिनेटमा गोल गर्दै टोलीलाई अग्रता दिलाएका बेलिङह्यामले ५४ औँ मिनेटमा अग्रता दोब्बर बनाएका थिए । ६५ औँ मिनेटमा भिनिसियस जुनियरले तेस्रो गोल गरे भने ७० औँ मिनेटमा जोसेलुले अर्को गोल थप्दै रियललाई सहज जित दिलाए ।
खेलको अन्त्यतिर जोसेलुले पेनाल्टीबाट गोल गर्ने अवसरबाट चुकेका थिए। जीतसँगै रियल ९ खेलबाट २४ अंकसहित स्पेनिस ला लिगाको अङ्क तालिकाको शीर्ष स्थानमा रहेको छ । शनिबार नै भएको अन्य खेलमा जिरोनाले क्याडिजलाई १–० ले हराउँदै दोस्रो स्थानमा उक्लिएको छ । जिरोनाको २२ अङ्क छ ।
