चितवन ।
चितवन राष्ट्रिय निकुञ्ज क्षेत्रमा गएको छ महिनामा नौ वटा गैँडा मरेका छन् । तीमध्ये दुईवटा चोरीसिकारीले मारेको र थप एउटा चोरी सिकारीले मारेको आशंका गरिएको बताईएको छ ।
यस वर्ष बुढो भएर र भिरबाट लडेर दुई, आपसमा जुधेर दुई र बाघ एवं गोहीको आक्रमणबाट दुईवटा गैँडा मरेको चितवन राष्ट्रिय निकुञ्जका सूचना अधिकारी गणेशप्रसाद तिवारीले जानकारी दिनुभयो । निकुञ्जले दिएको जानकारीअनुसार आर्थिक वर्ष २०७२÷७३ यता दुई सय ३५ वटा गैँडा मरेका छन् र तीमध्ये १२ वटा चोरी सिकारीले मारेको आशङ्का गरिएको छ ।
बुढो भएर, भिरबाट लडेर, दलदलमा फसेर, बाढीले बगाएर, आपसमा जुधेर, बाघ र गोहीले आक्रमण गरेर, विद्युतीय करेन्टमा परेर, रोग लागेर, खाडलमा परेर, विष सेवन गरेर गैँडा मर्ने गरेका छन् । निकुञ्जमा पछिल्लो गणनाअनुसार छ सय ९४ गैँडा छन् ।
यो समाचार पढेर हजुरले कस्तो महसुस गर्नुभएको छ ??
