बागलुङ ।
रुकुम पश्चिमबाट मध्यपहाडी लोकमार्ग हुँदै काठमाडौं जाँदै गरेको बागमती प्रदेश ०१–००६ ख ३८७९ नम्बरको रात्रिबस बागलुङको निसीखोला गाउँपालिका -६ जाउलेपानीमा सोमबार दुर्घटनामा परि ज्यान गुमाउनेको संख्या ९ पुगेको छ ।
जिल्ला प्रहरी कार्यालय बागलुङका सूचना अधिकारी प्रहरी नायब उपरीक्षक मदन केसीका अनुसार दुर्घटनामा रुकुमपूर्व सिस्ने गाउँपालिका -५ रुमाल बाराका २५ वर्षीय विक्रम परियार, दाङका १८ वर्षीय लक्की पुनमगर, रुकुमपश्चिम मुसिकोट -१ का २७ वर्षीया बिनिता केसी, रुकुमपश्चिम मुसिकोट नगरपालिका -२ रातामाटाका सवारी धनी बबिददेल नेपाली, गोर्खा घर भएकी गीता थापा, मुसिकोट नगरपालिका -४ सोलाबाङका ३५ वर्षीया टीका केसी, मुसिकोट नगरपालिका -३ साँखकी कल्पना केसी, रोल्पा घर भएका गाडी चालक सुवास गौतम भनिने मानसिंह विक र ललितपुरका सुजन महर्जनको मृत्यु भएको हो।दुर्घटनामा परी २८ जना घाइते भएका छन् ।
