काठमाण्डौ ।
पपुपा न्यूगिनीको एउटा गाउँ पहिरोले बगाउँदा तीन सय जना भन्दा धेरै हराइरहेका छन् । उत्तरी पपुवा न्यूगिनीको एन्गा प्रान्तको काओकालाम गाउँमा गएको एउटा भयानक पहिरोमा परेर तीन सय जना बेपत्ता भएको र ११ सय ८२ वटा घर पनि बगेका समाचार संस्था रोयटर्सले जनाएको छ । राजधानी पोर्ट मोर्सबीबाट छ सय किलोमिटर उत्तर पश्चिममा पर्ने निकै दुर्गम गाउँ पहिरोले बगाएको हो ।
गाउँमा सडक, बिजुली र इन्टरनेट अवरुद्ध हुँदा उद्धार कार्य प्रभावित भएको छ । यो पहिरोमा परेर सयौँ जनाको ज्यान गएको हुन सक्ने स्थानीय सञ्चारमाध्यमले उल्लेख गरेका छन् । अहिलेसम्म चार जनाको मात्रै शव भेटिएको छ ।
सडकमार्गबाट पुग्न असम्भव भएपछि घटनास्थलमा हेलिकप्टर परिचालन गरिएको छ । तर खराब मौसमका कारण हेलिकप्टर उडानसमेत प्रभावित भएको छ । पपुवा न्यूगिनीका प्रधानमन्त्री जेम्स मारापेले आपतकालीन टोलीले उद्धारको प्रयास गरिरहेको बताउनुभएको छ । -एजेन्सी
