स्कलर्स होम बोर्डिङ माध्यमिक विद्यालय बुटवलले ३१ औ बार्षिकोत्सव तथा विद्यार्थी प्रतिभा प्रस्फोटन कार्यक्रम आज (सोमबार) सम्पन्न गरेको छ । विद्यालय स्थापनाको ३१औं वर्ष पुरा गरेको अवसरमा स्कलर्स होम बोर्डिङले बार्षिकोत्सव तथा अभिभावक भेलासँगै विभिन्न विधामा उत्कृष्टता हाँसिल गर्ने विद्यार्थीलाई पुरस्कार वितरण कार्यक्रम गरेको छ । बार्षिकोत्सवको अवसर पारेर विद्यालयले सोमबारनै विद्यार्थी प्रतिभा प्रस्फोटन कार्यक्रम अन्तरगत विज्ञान प्रदर्शनी, खाना महोत्सव र विद्यार्थी गायन तथा नृत्य कार्यक्रम गरेको हो ।
विद्यालय परिषरमा विद्यार्थीले आयोजना गरेको खाना महोत्सवमा कोदो, खिर बबल टी लगायतका परिकार प्रदर्शन तथा विज्ञान प्रदर्शनीमा सोलार सिष्टम, भोल्कानो, साउण्ड प्रोडक्सन, हाइडोलिक, स्मार्टसीटि लगायतका आधुनिक आविश्कारहरु विद्यार्थीहरुले प्रदर्शन गरेको विद्यालयका प्राचार्य बाबुराम बन्जाडेले जानकारी दिनुभयो । बार्षिकोत्सव तथा विद्यार्थी प्रतिभा प्रस्फुटन कार्यक्रमको उद्घाटन गर्दै बुटवल उपमहानगरपालिका वडा नं ९ का अध्यक्ष प्रदिपकुमार श्रेष्ठले विद्यार्थीको चौतर्फि विकासका लागि प्रतिभा प्रस्फुटन कार्यक्रम उपयुक्त थलो भएको उल्लेख गर्दै शैक्षिक गुणस्तरवृद्धिमा स्कलर्स होमले खेलेको भुमिकाका बारेमा चर्चा गर्नुभयो।
कार्यक्रममा एन प्याब्सनका केन्द्रीय सदस्य देउप्रकाश राई, एन प्याब्सन जिल्ला अध्यक्ष पुरुषोत्तम बस्याल, अभिभावक संघका रुपन्देही अध्यक्ष लोकनाथ ज्ञवाली, विद्यालयका संस्थापक प्राचार्य शिव गुरुङ्ग लगायतले शैक्षिक विकास सक्रिय संस्थापक विद्यालयहरुको स्तरवृद्धि गर्न सरकार सकारात्मक हुनुपर्ने बताउनुभयो । विद्यालयका प्रशासकीय प्रमुख लोकराज भण्डारी (राजु)को संचालनमा भएको कार्यक्रममा ५० बढी विधामा उत्कृष्टता हासिल गर्ने तीन सय विद्यार्थीलाई तथा अभिभावकहरु विच खेलाइएको बेलुन ब्लाष्ट, मेमोरी पावर प्रतियोगितामा उत्कृष्टता हासिल गर्ने अभिभावकहरुलाई शिल्ड मेडल, तथा प्रमाणपत्रले पुरस्कृत गरिएको थियो।
