काठमाडौं ।
पोखरामा आइतबारयात्रुबाहक बस दुर्घटना हुँदा ५१ जना घाइते भएका छन् पोखरा–बेगनास ताल रुटमा चल्ने ग १ ख ६७४७ नम्बरको बस पोखरा बजारतर्फ आउँदै गर्दा पृथ्वी राजमार्गस्थित पोखरा–२७ सडकबाट २० मिटर तल खोल्सामा खसेको थियो । घाइतेहरूको अवस्था सामान्य रहेको अस्पतालहरूले जानकारी दिएको जिल्ला प्रहरी कार्यालय कास्कीका प्रहरी निरीक्षक ज्ञानबहादुर खड्काले जानकारी दिनुभएको छ । घाइते हुनेहरूमा अधिकांश विद्यार्थी रहेका छन् ।
घाइतेमध्ये दुईरदुई जनाको फिस्टेल अस्पताल र मेट्रोसिटी, तीन जनाको मेडिप्लस अस्पताल, पाँच जनाको गण्डकी मेडिकल कलेज अन्य बाँकीको पोखरा स्वास्थ्य विज्ञान प्रतिष्ठानअन्तर्गतको पश्चिमाञ्चल क्षेत्रीय अस्पतालमा उपचार भइरहेको प्रहरी निरीक्षक खड्काले जानकारी दिनुभयो । चिकित्सकका अनुसार घाइतेहरूको हातखुट्टामा चोटपटक लागेको छ । बसका चालक र सहचालकलाई प्रहरीले नियन्त्रणमा लिएको छ । दुर्घटनामा परेका विद्यार्थी सोमबार पोखरा विश्वविद्यालयको दीक्षान्त समारोहका लागि लगाउने पोसाक लिएर फर्कँदै गरेको प्रहरीले जनाएको छ ।
