एजेन्सी ।
चिनियाँ रक्षामन्त्री लि साङफुले चीन र अमेरिकाबीचको टकराव सिंगो विश्वका लागि पीडादायी हुने बताउनु भएको छ । एशियाका वरिष्ठ सुरक्षाविद्हरु संलग्न साङ्ग्रीला संवादमा बोल्दै रक्षामन्त्री लि ले चीन–अमेरिकाबीच हुने कुनै पनि टकरावले विश्वमै असह्य पीडा र आपत निम्त्याउने बताउनुभयो । चीन र अमेरिका विल्कुल फरक प्रणाली अँगालेका देश हुन र धेरै विषयमा फरक छन् भन्दै उहाँले यसकै कारण साझा विन्दु र सहयोगका क्षेत्रबाट यी दुई देशलाई अलग राख्नु नहुने बताउनुभयो । एशियामा नाटो जस्तै सैन्य संगठन बनाउने चेष्टा नगर्न अमेरिकीलाई चेतावनी दिंदै उहाँले त्यसले एशियालाई द्वन्दको दलदलमा फसाउने ठोकुवा पनि गर्नुभयो । ताइवान, साउथ चाइना सी र हालै अमेरिकाले चिनियाँ चिप्समा लगाएको प्रतिबन्धलगायतका थुप्रै विषयमा चर्को मतभेद रहेको छ । जसका कारण बेला बेलामा यी दुई देशबीच तनाव उत्पन्न हुदै आएको छ । तर, प्रत्यक्ष टकराव भने अहिलेसम्म भएको छैन ।
