देवदह । निजी तथा आवासीय विद्यालय अर्गनाईजेसन नेपाल (प्याब्सन) देवदहले विद्यार्थीलाई मोटिभेसनल र विद्यालयमा कार्यरत चालक तथा सह चालकलाई ट्राफिक सचेतना कार्यक्रम सम्पन्न गरेको छ ।
मङ्गलबार एक कार्यक्रमको आयोजना गरी विद्यार्थीहरुलाई मोटिभेशनल कार्यक्रम सम्पन्न गरिएको हो । विद्यार्थीहरुलाई अनुशासित, संस्कारित सङ्गै अध्ययन अध्यापनमा प्रेरित गर्ने उद्देश्यले मोटिभेशनल कार्यक्रम गरिएको प्याब्सन देवदहका अध्यक्ष राम बहादुर गुरुङले जानकारी दिनुभयो ।
कार्यक्रममा प्रशिक्षक एंव मोटिभेटर विष्णु प्रसाद देवकोटाले विद्यार्थीलाई प्रशिक्षण दिनु भएको थियो । विद्यार्थीहरुले पालना गर्नुपर्ने अनुशासन, उनीहरुको ब्यक्तित्व बिकास, असल बानी ब्यवहार, अभिभावकप्रतिको जिम्वेवारी, संस्कार र संस्कृति, काम र पढाईबिचको समन्वय लगायतका बिषयमा प्रशिक्षण गराइएको थियो । कार्यक्रममा प्याब्सन देवदहमा आबद्ध विद्यालयका ८५० जना बढी विद्यार्थीको सहभागिता रहेको थियो ।
कार्यक्रमलाई सम्बोधन गर्दै देवदह नगरपालिकाको उपप्रमुख विद्या लक्ष्मी गुरुङले शुभकामना मन्तव्य व्यक्त गर्दै शिक्षा ज्ञानको ज्योति भएको र शिक्षा विना जीवन अन्धकार रहेको बताउनुभयो । विद्यार्थीले अभिभावक तथा शिक्षकले भनेका कुरा मानेर अनुशासित भएर पढ्न समेत विद्यार्थीलाई आग्रह गर्नुभयो । निजि विद्यालय शिक्षा क्षेत्रमा पुर्याएको योगदानको कदर गर्दै उपप्रमुख गुरुङले शिक्षा क्षेत्रको विकासका लागि नगरपालिकाले विशेष योजना बनाएर काम गरिरहेको बताउनुभयो ।
त्यस्तै प्याब्सन देवदहमा आवद्ध रहेका विद्यालयमा सवारी चालक र सह चालकको रुपमा कार्यरत कर्मचारीलाई ट्राफिक सम्बन्धि सचेतना कार्यक्रम समेत सम्पन्न भएको छ ।
सवारी साधन चलाउदा ध्यानदिनु पर्ने बिषय, ट्राफिक संकेतलगायतका बिषयमा चालक र सहचालकलाई सहजीकरण गरिएको थियो ।
प्याब्सन देवदहका नगर अध्यक्ष राम बहादुर गुरुङको अध्यक्षता, उपाध्यक्ष टिकाराम चापागाईंको स्वागत र सचिव कृष्ण गैरेको संचालनमा कार्यक्रम सम्पन्न भएको थियो ।
