एजेन्सी ।
दक्षिण अमेरिकी राष्ट्र बोलिभियाले समुद्री सतहबाट चार हजार एकसय ५० मिटरको उचाइमा सुविधा सम्पन्न फुटबल रंगशाला बनाएको छ । उक्त रंगशाला बोलिभियाको चर्चित सहर एल अल्टोमा निर्माण गरिएको छ । त्यो रंगशालाको नाम ‘एल अल्टो म्युनिसिपल स्टेडियम’ राखिएको छ । सोही रंगशालामा मंगलबार राति व्यावसायिक फुटबल खेलिएपछि कोपा लिबर्टाडोरेसमा कीर्तिमान बनेको अन्तर्राष्ट्रिय सञ्चारमाध्यमले जनाएका छन् ।
दक्षिण अमेरिकी क्षेत्रमा कोपा लिबर्टाडोरेस युरोपियन व्यावसायिक फुटबलको च्याम्पियन्स लिग बराबरको प्रतियोगिता हो । त्यो रंगशालामा बोलिभियन क्लब अलवेज रेडी र पेरुको क्लब स्पोर्टिङ क्रिस्टलबिच व्यावसायिक फुटबल खेलाइएको थियो । यसअघि कोपा लिबर्टाडोरेसको कुनै पनि खेल यति उचाइमा खेलाइएको थिएन । पेरुमा भने त्योभन्दा पनि उचाइमा सुविधा सम्पन्न फुटबल रंगशाला बनाइएको छ । पेरुको सेरो डी पास्कोमा बनाइएको फुटबल रंगशाला समुद्री सतहबाट चार हजार तीन सय मिटरको उचाइमा छ ।
तर, पेरुको त्यो रंगशालामा हालसम्म कोपा लिबर्टाडोरेसको कुनै खेल खेलाइएको छैन । अलवेज रेडी र स्पोर्टिङ क्रिस्टलबिच भएको खेल पहिलो हाफमा १–१ गोलको बराबरीमा सकिएको थियो । तर, दोस्रो हाफमा भने बोलिभियन क्लब अलवेज रेडी हाबी भएको थियो । उक्त खेलमा घरेलु क्लब अलवेज रेडी ६–१ गोलले विजयी भएको थियो । ‘अत्यधिक उचाइमा फुटबल खेल्न निकै गाहृो हुन्छ । अक्सिजनको अभाव हुने भएकाले खेलाडीले स्वाभाविक प्रदर्शन गर्न सक्दैनन् । त्यसैले हाम्रा खेलाडीले राम्रो खेल्न सकेनन्,’ खेलपछि स्पोर्टिङ क्रिस्टलका प्रमुख प्रशिक्षक एन्डर्सन मोरेइराले भनेका छन् ।
२२ हजार दर्शक क्षमताको ‘एल अल्टो म्युनिसिपल स्टेडियम’ को निर्माण सन् २०१३ को डिसेम्बर १ मा थालिएको थियो । रंगशालाको निर्माण कार्य सन् २०१७ को जुलाईमा सम्पन्न भएको थियो । रंगशाला निर्माण गर्न ८० लाख अमेरिकी डलर खर्च गरिएको थियो ।
