एजेन्सी ।
विषाक्त कफ सिरप सेवनका कारण ६८ जना बालबालिकाको मृत्यु भएको मामिलामा उज्बेकिस्तानको सर्वोच्च अदालतले २१ जनालाई जेल सजाय सुनाएको छ । सोमबार अदालतले विषाक्त कफ सिरप काण्डमा दोषी ठहर भएका ती २१ जनालाई २०/२० वर्षको जेल सजाय सुनाएको हो ।
यिनीहरूलाई भ्रष्टाचार, धोखाधडी, लापरवाही र जालसाझीको मामिलामा अदालतले दोषी ठहर गरेको थियो । सजाय पाउनेमा भारतीय व्यवसायी राघवेन्द्र प्रताप पनि भएको बताइएको छ । सन् २०२२ देखि सन् २०२३ को बीचमा उज्बेकिस्तानमा कम्तीमा पनि ८६ जना बालबालिकाहरूले विषाक्त कफ सिरप खुवाइएको थियो । यीमध्ये ६८ जना बालबालिकाको मृत्यु भएको थियो । विषाक्त औषधि भारतको फर्मा कम्पनी मेरियन बायोटेकले बनाएको थियो ।
डब्ल्यूएचओले सिरपबारे जारी गरेको थियो अलर्ट
मेरियन बायोटेकको एम्ब्रोनोल सिरप र डीओके–१ म्याक्स नाम गरेका खोकीको दुईवटा झोल औषधि बालबालिकालाई सेवनका लागि दिन नहुने भन्दै जनवरी २०२३ मा विश्व स्वास्थ्य संगठन (डब्लुएचओ) अलर्ट नै जारी गरेको थियो । यो मामिला बाहिर आएपछि भारत सरकारले सन् २०२३ को मार्चमा मेरियन बायोटेकको उत्पादन लाइसेन्स नै रद्द गरिदिएको थियो ।
