बुटवल ।
गुल्मीको जिल्ला अदालतभित्र श्रीमानले श्रीमतीमाथि कुटपिट गरेका छन् । सम्बन्धविच्छेदको लागि जिल्ला अदालतमा पुगेका छत्रकोट गाउँपालिका-३ का हर्दिनेटा निवासी दीपक श्रेष्ठले श्रीमतीलाई कुटपिट गरेका हुन् ।
उनीहरु सम्बन्धविच्छेदको मुद्दाको पेसीका लागि जिल्ला अदालत आएका थिए । न्यायाधीशले हिजो आदेश वा फैसला गर्ने कार्यतालिका रहेको थियो तर न्यायाधीश कहाँ जान नपाउँदै सिँढीमा श्रीमतीलाई निर्घात कुटपिट गरेको अदालतका सूचना अधिकारी कमल पन्थीले जानकारी दिए ।
कुटपिटबाट घाइते श्रीमती मनसुवालाई थप उपचारका लागि प्रवास पठाईएको छ, भने श्रीमती कुट्ने दीपकलाई प्रहरीले नियन्त्रणमा लिएको छ । अब उनलाई कुन मुद्दा चलाउने भन्ने छलफलपछि मात्रै निचोड निकालिने सूचना अधिकारी पन्थीले बताए ।
हर्दिनेटाका दीपक र अर्घाखाँचीको सन्धिखर्क नगरपालिका – २ चुत्राबेँसीकी मनसुवाबीच ६ वर्षपहिले विवाह भएको थियो । श्रीमान-श्रीमतीबीच सम्बन्ध बिग्रिएपछि श्रीमती मनसुवा विगत एक वर्षदेखि माइतीमै बस्दै आएकी थिईन । उनीहरुको ०८० फागुन १३ गते गुल्मी जिल्ला अदालतमा सम्बन्धविच्छेदको मुद्दा दर्ता भएको थियो ।
