काठमाण्डौ //
बलात्कारको आरोप लागेर कारागरमा रहेका क्रिकेटर सन्दीप लामिछाने २० लाख रुपैयाँ धरौटी बुझाएर रिहा भएका छन। केन्द्रीय कारागार सुन्धाराबाट लामिछाने रिहा भएका हुन । हिजो उच्च अदालत पाटनका न्यायाधीशद्वय रमेश ढकाल र ध्रुवराज नन्दको इजालसले सन्दीपलाई २० लाख रुपैयाँ धरौटी बुझाएर रिहा गर्न आदेश दिएसंगै उनी आज रिहा भएको कानुन व्यवसायी सरोज घिमिरेले जानकारी दिनुभयो।
लामिछाने तीन महिना नौ दिन कारागारमा बसेर रिहा भएका हुन् । पाटन उच्च अदालतका रजिस्ट्रार ठगिन्द्र कट्टेलका अनुसार लामिछाने काठमाण्डौ उपत्यकाबाहिर जाँदा जिल्ला प्रहरी कार्यालय काठमाण्डौको अनुमति लिनुपर्नेछ भने पीडित परिवारलाई कुनै पनि माध्यमबाट सम्पर्क गर्न, डर, त्रास वा धम्की दिन नपाउने गरी थुनामुक्त गरिएको हो ।
लामिछानेमाथि नाबालिग किशोरीलाई बलात्कार गरेको आरोपमा गएको कात्तिक १४ गते काठमाण्डौ जिल्ला अदालतमा मुद्दा दायर गरिएको थियो ।
सरकारी वकिल कार्यालयले दर्ता गरेको मुद्दामा लामिछानेलाई १० देखि १२ वर्षसम्म कैद सजाय हुनुपर्ने मागसमेत गरिएको थियो । लामिछानेले भने आफूविरुद्ध लागेको बलात्कार आरोप अस्वीकार गर्दै आफू निर्दोष रहेको र बलात्कार नगरेको बयान दिएका थिए । लामिछाने गएको असोज २० मा त्रिभुवन अन्तर्राष्ट्रिय विमानस्थलबाटै प्रक्राउ परेका थिए ।
