भैरहवा ।
भैरहवामा जारी नेपाल टेलिकम रुपन्देही सुपर लिग क्रिकेट प्रक्रियोगिता अन्तर्गत डिभिजन ‘ए’ को आज मंगलबारको खेलमा तिरुपति क्रिकेट क्लब विजयी भएको छ तिरुपतिले बुद्ध क्रिकेट क्लबलाई २ विकेटले पराजित गर्दै जित निकालेको हो । सिद्धार्थ रंगशालामा टस हारेर ब्याटिङको निम्तो पाएको बुद्धले निर्धारित ५० ओभरको खेलमा ४०।१ ओभरमा सबै विकेट गुमाउँदै १ सय ३२ रनको झिनो योगफल बनायो । जवाफी ब्याटिङ गरेको तिरुपतिले २९।३ ओभरमा ८ विकेटको नोक्सानीमा १ सय ३५ रन बनाउँदै जित निकाल्यो ।
उसको जितमा आनन्द गौडले नटआउट ४७, वसिर अहमदले २४ र नन्दलाल चाईले १८ रनको योगदान दिए । बुद्धका कमल परियारले १०ओभर बलिङ गर्दै २ मेर्डन राखेर २८ रन खर्चंदै ६ विकेट लिएभने विपिन न्यौपानेले २ विकेट लिन सफल भए । तिरुपति का विवेक यादव म्यान अफ द म्याच भई एक हजार रुपैयाँ प्राप्त गरेको आयोजक संस्था रुपन्देही क्रिकेट संघका उपाध्यक्ष एवंम् प्रतियोगिता संयोजक धिरज अधिकारीले जनाए । चैत्र ३ गतेसम्म चल्ने प्रतियोगिता मा बिजेताले १ लाख रुपैयाँ र ट्रफी तथा उपबिजेताले ५० हजार र ट्रफी प्राप्त गर्नेछन् ।
