एजेन्सी ।
भारतीय चर्चित कमेडियन एवं अभिनेता कपिल शर्मा अभिनित फिल्म ‘ज्विगाटो’ को दोस्रो ट्रेलर सार्वजनिक भएको छ । फिल्मको ट्रेलर बुधबार रिलिज भएको हो । फिल्मलाई निर्देशक नन्दिता दासले निर्देशन गरेकी हुन् । कपिल ‘ज्विगाटो’ मा फुड डेलिभरी ब्वाईको भूमिकामा देखिएका छन् । लगभग दुई मिनेट सात सेकेन्ड लामो ट्रेलरमा कपिलसँगै सहाना गोस्वामीलाई देख्न सकिन्छ । फिल्ममा उनी कपिलको श्रीमतीको भूमिकामा छिन् ।
ट्रेलरमा फुड डेलिभरी ब्वाईले गर्नु परेको संघर्ष र जीवन निर्वाह गर्नका लागि गरिएको कडा मेहनत देखाइएको छ । ट्रेलरमा धेरै भावुक दृश्यहरू पनि देखाइएको छ । डेलिभरी गर्ने एक व्यक्तिको कामले अरूको पेट भरेर सन्तुष्टि दिलाए पनि यो भागदौडमा उसको निजी जिन्दगीको सन्तुलन बिग्रिएको कथा फिल्ममा समावेश गराएको छ।
यो समाचार पढेर हजुरले कस्तो महसुस गर्नुभएको छ ??
