काठमाडौ ।
त्रिभुवन विश्वविद्यालय (त्रिवि)ले आउँदो चैत ५ गते सञ्चालन गर्न लागेको स्वतन्त्र विद्यार्थी युनियनको निर्वाचन प्रक्रिया आज (शुक्रबार)देखि सुरु हुँदैछ। निर्वाचनका लागि प्रत्येक क्याम्पसमा क्याम्पस प्रमुख संरक्षक हुने गरी निर्वाचन समिति गठन गरिएको छ। उक्त समितिले नै क्याम्पसमा स्ववियु निर्वाचन गराउने छ। यसअघि त्रिविका शिक्षाध्यक्ष प्राध्यापक डा. शिवलाल भुसालको अध्यक्षतामा १६ सदस्यीय स्ववियु निर्वाचन केन्द्रीय अनुगमन तथा समन्वय समिति गठन गरिसकेको छ। आउँदो चैत ५ गते देशभरका त्रिविका ६२ आङ्गिक र एक हजार ४० सम्बन्धन प्राप्त क्याम्पसमा स्ववियु निर्वाचन हुँदै छ।
विश्वविद्यालयअन्तर्गतको विद्यार्थी कल्याण तथा खेलकुद निर्देशनालयले सार्वजनिक गरेको कार्यतालिका अनुसार निर्वाचनमा भाग लिन चाहने विद्यार्थी सङ्गठनले फागुन १९ गते अपराह्न ३ बजेभित्रमा दर्ता गर्नुपर्नेछ । फागुन २१ गते निर्देशनालयले मतदाताको नामावली प्रकाशन गर्नेछ। उक्त नामावलीउपर फागुन २५ गते दिउँसो १ बजेभित्रमा दाबी विरोध गर्न पाइने तथा दाबी विरोधमाथि छानबिन गरेर सोही दिनको साँझ ५ गते मतदाताको अन्तिम नामावली सार्वजनिक गरिने निर्देशनालयका सदस्यसचिव प्राध्यापक पशुपति अधिकारीले जानकारी दिनुभयो। फागुन २६ गते प्रत्यक्ष र समानुपातिकतर्फका उम्मेदवारको मनोनयनपत्र वितरण गरिने र फागुन २७ गते बिहान ११ बजेदेखि दिउँसो २ बजेसम्म प्रत्यक्ष र समानुपातिक दुवैतर्फको मनोनयनपत्रको नामावली दाखिला हुने अधिकारीले जानकारी दिनुभयो।
हरैया बहुमुखी क्याम्पसमा ४ बिधार्थी संगठन दर्ता
रुपन्देहीको कञ्चन गाउपालिकामा रहेको हरैया बहुमुखी क्याम्पसमा पनि स्ववियु निर्वाचन हुने भएको छ। यो समाचार तयार गर्दासम्म क्याम्पसमा हुने स्ववियू निर्वाचनका लागि ४ बिधार्थी संगठनहरु दर्ता भएको स्ववियू निर्वाचन हरैया बहुमुखी कयाम्पसका मुख्य निर्वाचन अधिकृत रामजी आचार्यले जानकारी दिनु भएको छ। चैत्र ५ गते हुने स्ववियू निर्वाचनका लागि अखिल प्रगतीशिल मोर्चा, अनेरास्वयिू(एस), नेपाल विधार्थी संघ, जनमत बिधार्थी संघले हरैया बहुमुखी क्याम्पसमा संगठन दर्ता गरेको स्ववियू निर्वाच समिति हरैया बहुमुखी क्याम्पसका संरक्षक प्रकाश खनालले जानकारी दिनु भएको छ। आज दिउस २ बजे सम्म संगठन दर्ता गर्ने समय रहेको मुख्य निर्वाचन अधिकृत आचार्यले जानकारी दिनु भएको छ। शिक्षा शास्त्र र बाणिज्य शास्त्रको अध्ययन अध्यापन हुने हरैया बहुमुखी क्याम्पसमा ५५७ जना बिधार्थी रहेका छन।
