एजेन्सी ।
फिल्म ‘तू झुठी मैं मक्कार’ रिलिज भएको केही समयपछि अनलाइनमा लिक भएको छ । भारतीय अभिनेता रणवीर कपूर र अभिनेत्री श्रद्धा कपूर अभिनित रोमान्टिक कमेडी फिल्म बुधबार रिलिज भएको हो । लव रञ्जन निर्देशित फिल्म यस वर्षको सबैभन्दा प्रतिक्षित बलिउड फिल्महरू मध्ये एक हो। भारतीय सञ्चार माध्यमका अनुसार फिल्मले पहिलो दिन बक्स अफिसमा राम्रो कमाइ गर्ने अपेक्षा निमार्ण टिमले गरेका थिए । तर यसैबीच फिल्म रिलिज भएलगत्तै अनलाइन लिक भएको छ । फिल्म रिलिज भएको केही घण्टाभित्रै यसलाई अवैध रूपमा तमिलरोकर्स, फिल्मजिल्ला, मुभिरुल्स जस्ता वेबसाइटहरूमा उपलब्ध गराइएको छ । फिल्म एचडी क्वालिटीमा धेरै वेबसाइटमा उपलब्ध छ ।
तर, फिल्मको एचडी प्रिन्ट कहाँबाट चोरी भएको हो भन्ने खुल्न सकेको छैन । यस्ता घटना सार्वजनिक भएको यो पहिलो पटक भने होइन । यसअघि पनि धेरै चलचित्र रिलिज हुनुअघि वा रिलिज भएको केही घण्टापछि नै लिक भएका छन् । यसअघि शाहरुख खानको ‘पठान’ र अजय देवगनको ‘दृश्यम २’ लगायतका धेरै फिल्महरु अनलाइन लिक भएका थिए । फिल्ममा रणवीर र श्रद्धाबाहेक बोनी कपुर र डिम्पल कपाडिया पनि मुख्य भूमिकामा छन् ।
