काठमाण्डौ ।
नेपालमा पहिलो पटक (एमपक्स) अर्थात् मङ्कीपक्सको सङ्क्रमण पुष्टि भएको छ । एक जनामा मङ्कीपक्सको लक्षण देखिएर नमुना सङ्कलन गरी राष्ट्रिय जनस्वास्थ्य प्रयोगशाला टेकुमा परीक्षण गर्दा यो रोगको पुष्टि भएको स्वास्थ्य तथा जनसङ्ख्या मन्त्रालयले विज्ञप्ति निकालेर जानकारी गराएको छ । एक सय ११ देशमा पुष्टि भएको यो रोग नेपालमा पहिलो पटक भेटिएको हो । स्वास्थ्य मन्त्रालयका सहप्रवक्ता डा। समिरकुमार अधिकारीले विदेशी नागरिकमा मङ्कीपक्स देखिएको बताउनुभयो । सङ्क्रमण पुष्टि भएका विदेशी नागरिक काठमाण्डौको एक अस्पतालमा डाक्टरको निगरानीमा उपचार गराइरहेका छन् ।
अर्थोपोक्स भाइरस परिवारको मङ्कीपक्स भाइरसबाट हुने यो रोग मानिसबाट मानिस वा जनावरबाट मानिसमा सर्ने विश्व स्वास्थ्य सङ्गठनले जनाएको छ । सन् १९८० मा मध्य पूर्वी र पश्चिम अफ्रिकामा देखिएको मङ्कीपक्स त्यसयता निरन्तर देखिइरहेको छ । अघिल्लो वर्षदेखि यसले विश्वव्यापी प्रकोपको रूप लिएको छ। यो भाइरस सङ्क्रमण भएपछि शरीरमा पानीसहितको मसिनो बिमिरा आउने र त्यही बिमिरा फुटेर त्यहाँभित्र भएको पानी अर्को व्यक्तिको शरीरमा पुगेर सङ्क्रमण हुन सक्ने साथै सङ्क्रमित व्यक्तिको सिँगान, कफ तथा कपडा प्रयोग गरेमा पनि यो भाइरस सर्ने जोखिम हुन्छ । स्वास्थ्य मन्त्रालयले विज्ञप्तिमा सम्भावित लक्षण भएका व्यक्तिसँग असुरक्षित सम्पर्कमा नजाने, हात धुने, स्यानिटाइजर प्रयोग गर्नेलगायतका सावधानी अपनाउन भनिएको छ । यस्तै लक्षण देखिएमा सम्पर्क गर्न पनि स्वास्थ्य मन्त्रालयले आग्रह गरेको छ ।
