काठमाडौँ ।
इटालियन सिरिए फुटबलमा युभेन्ट्सले आफ्नो अपराजित यात्रा कायमै राखेको छ । युभेन्ट्सले सोमबार विहान सम्पन्न खेलमा एम्पोलीमाथि २—० गोलको सजिलो जित हासिल गर्यो । युभेन्ट्सले खेलको दुबै हाफमा एक—एक गोल गरेको थियो। खेल सुरु भएको २४ औं मिनेटमा युभेन्ट्सका लागि ड्यानिलोले पहिलो गोल गरेका थिए । निर्धारित समयको खेल सकिनुभन्दा आठ मिनेटअघि फेड्रिको चिएसाले दोस्रो गोल थपेका थिए ।
जारी सिजनको इटालियन सिरिएमा चारवटा टोली हालसम्म अपराजित छन् । युभेन्ट्स पनि त्यसैमध्ये एक हो । तीन खेल खेलेको युभेन्ट्स दुई जित र एक बराबरीको नतिजाबाट सात अंक बटुल्दै तालिकाको तेस्रो स्थानमा आसिन छ ।
तालिकाको पहिलो स्थानमा आसिन इन्टर मिलानले तीन जितबाट नौ अंक जोडेको छ । इन्टर मिलानले आफ्नो पछिल्लो खेलमा फियोरेन्टिनालाई ४—० गोलको फराकिलो अन्तरले हराएको थियो । तीन जितबाट नौ अंक बटुलेको एसी मिलान भने तालिकाको दोस्रो स्थानमा छ । एसी मिलानले आफ्नो पछिल्लो खेलमा एएस रोमालाई २—१ गोलले पराजित गरेको थियो ।
