पाल्पा ।
पाल्पामा पहिलो पटक आज एक दिने सुन्तला महोत्सवको आयोजना गरिएको छ ।
सुन्तलाको बजार प्रवर्द्धन र सुन्तला उत्पादन गर्ने किसानलाई प्रोत्साहनका लागि महोत्सवको आयोजना गरिएको आयोजक रिब्दिकोट गाउँपालिका–७ वडा कार्यालय, पालुङ्मैनादीले जनाएको छ ।
मेलाको व्यवस्थापन तथा समन्वय गरिरहेको मैनादी कृषि सहकारी संस्थाका अनुसार प्रभात माविको प्राङ्गणमा आयोजना गरिएको सुन्तला महोत्सवमा सुन्तलाका स्टल, विभिन्न जातका सुन्तलाका बिरुवा तथा आवश्यक यन्त्र उपकरणको प्रदर्शन, नि:शुल्क माटो परीक्षण, नमुना सुन्तला बगैँचा अवलोकन, सुन्तलाको जुस, जाम, सलाद प्रदर्शन गरिएको छ ।
मेलामा सुन्तला खाने प्रतियोगिता, कृषि पर्यटनको नमुना टोल प्रर्दशन, पहिलो व्यावसायिक खेती गर्ने किसान सम्मान लगायतका कार्यक्रम रहने आयोजकले जनाएकाे छ । पाल्पामा पछिल्लो समय अन्य खेती छाडेर पनि किसानहरु सुन्तला खेतीतर्फ किसान आकर्षित हुँदै गएका छन् ।
पाल्पाको रिब्दीकोट र रैनादेवी छहरा गाउँपालिका किसानले सुन्तला उत्पादनबाट वार्षिक एक लाखदेखि २० लाख रुपैयाँसम्म आम्दानी गर्दै आएका छन । पाल्पामा उत्पादन भएको सुन्तला बुटवल, भैरहवा, पोखरा, काठमाण्डौ, जनकपुरलगायका ठाउँमा निर्यात हुँदै आएको छ ।
