काठमाण्डौ ।
दक्षिण कोरियामा ब्याट्री बनाउने कारखानामा कयौँ लिथियम ब्याट्री विस्फोट हुँदा आगलागी भएको छ । यस घटनामा १६ जनाको मृत्यु भएको बताइएको छ । घटना सोमबार बिहानको हो । दक्षिण कोरियाको राजधानी सोलबाट ४५ किलोमिटर टाढा रहेको ह्वासेङ सहरको एउटा कारखानामा आगलागी भएको सञ्चारमाध्यामहरुले बताएका छन् ।
अग्नि नियन्त्रकहरूले आगो निभाउन सक्दो प्रयास गरिरहँदा पनि कारखानामा स–साना विस्फोट भइरहेको स्थानीय टेलिभिजन फुटेजमा देखिएको थियो । सो क्रममा कारखानाको छानाको एक भाग भत्किएको थियो। दक्षिण कोरिया लिथियम ब्याट्रीको ठुलो आपूर्तिकर्ता हो। यहाँ बनाइएका ब्याट्रीहरू विद्युतीय सवारी साधनदेखि ल्यापटपसम्म कयौँ उपकरणमा प्रयोग गरिन्छ ।
यस घटनामा हालसम्म १६ जनाको मृत्यु भएको र सात जना घाइते भएको ह्वासेङको मेडिकल अथोरिटीका एक अधिकारीले बताएका छन् । सो कारखानाको दोस्रो तल्लामा अन्यत्र पठाउन प्याक गरेर करिब ३५ हजार ब्याट्री राखिएको थियो । ब्याट्रीमा आगो कसरी लाग्यो भन्ने अहिलेसम्म थाहा हुन सकेको छैन । घटनाको समयमा कारखानामा करिब एकसय कर्मचारी काम गरिरहेका थिए । -एजेन्सी
