काठमाण्डौ ।
रासायनिक मलमा दिँदै आएको अनुदान सरकारले घटाएको छ । ११ दशमलव ८ प्रतिशतले अनुदानमा घटाएको हो । मल आपूर्ति तथा वितरण व्यवस्थापन समितिको आज सोमवार बसेको बैठकले अब आयात हुने विन्दुमा मूल्य बढाउने निर्णय गरेको छ । नयाँ मूल्यअनुसार किसानलाई युरिया प्रतिकिलो २५ रुपैयाँ, डीएपी ५० रुपैयाँ र पोटास ४० रुपैयाँ पर्ने भएको छ ।
अहिले रासायनिक मलमा सरकारले ८० प्रतिशतसम्म अनुदान दिँदा युरिया प्रतिकिलो १४ रुपैयाँ, डीएपी ४३ रुपैयाँ र पोटास प्रतिकिलो ३१ रुपैयाँमा बिक्री हुँदै आएको थियो । यसअघिको तुलनामा अब युरिया मल किलोमा ११ रुपैयाँ, डीएपी किलोमा सात रुपैयाँ र पोटास किलोमा नौ रुपैयाँले महँगो भएको मन्त्रालयका प्रवक्ता प्रकाशकुमार सञ्जेलले जानकारी गराउनुभयो । बढेको मूल्यमा मलको बिक्री र बजार अनुगमनका लागि मन्त्रालयले गृह मन्त्रालयलाई आग्रह समेत गरिएको छ ।
