एजेन्सी ।
संयुक्त राष्ट्र संघले सुनामीबाट ध्वस्त फुकुसीमा आणविक केन्द्रको प्रशोधित फोहोर पानी समुन्द्रमा छोड्ने जापानको योजना अन्तर्राष्ट्रिय मापदण्ड अनुरुप रहेको जनाएको छ । संयुक्त राष्ट्रसंघीय निगरानी निकाय अन्तर्राष्ट्रिय आणविक उर्जा एजेन्सीले जापानको उक्त योजना कार्यान्वयन हुँदा वातावरणमा नगन्य प्रभाव पार्ने बताएको छ। आणविक केन्द्रको पानी समुन्द्रमा मिसाउने जापानको योजनाप्रति चीन र दक्षिण कोरियाले चर्को विरोध गरेपछि अन्तर्राष्ट्रिय आणविक उर्जा एजेन्सीको उक्त धारणा सार्वजनिक भएको हो । प्रशान्त महासागरमा पानी छोड्ने जापानको योजना छ ।यद्दपि जापानले आणविक केन्द्रको पानी समुन्द्रमा छोड्ने मिति घोषणा गरेको छैन । उक्त योजना कार्यान्वयनको लागि अझै नियामक निकायबाट अन्तिम स्वीकृति लिनुपर्ने हुन्छ । सन् २०११ मा गएको ९ म्याग्निच्युडको भूकम्पपछि आएको सुनामीले फुकुसिमा आणविक उर्जा केन्द्रका तीनवटा रिएक्टरहरु बाढीले ध्वस्त पारेको थियो ।
