एजेन्सी ।
गएको शुक्रवार राति जाजरकोट केन्द्रविन्दु भएर गएको ६ दशमलव ४ रेक्टर स्केलको भूकम्पका कारण ६२ हजार १२ परिवार घरबासविहीन भएको तथ्यांक सार्वजनिक भएको छ । पछिल्लो विवरणअनुसार १३ वटा जिल्लामा गरी २६ हजार पाँच सय ५७ घर पूर्णरूपमा र ३५ हजार चार सय ५५ घर आंशिकरूपमा भत्किएका गृह मन्त्रालयले सार्वजनिक गरेको विवरणमा उल्लेख गरिएको छ । सबैभन्दा धेरै रुकुम पश्चिममा १६ हजार पाँच सय ७० घर पूर्ण र नौ हजार नाै सय ६१ घर आंशिकरूपमा भत्किएका छन् ।
यस्तै जाजरकोटमा नौ हजार सात सय ९४ घर पूर्ण र २४ हजार सात सय सात घर आंशिकरूपमा भत्किएका छन्। सल्यानमा एक सय ५१ घर पूर्ण र पाँच सय १२ घर आंशिकरूपमा भत्किएका छन् । यसैगरी रुकुम पूर्व, नवलपरासी पूर्व, दैलेख, दाङ, बैतडी, जुम्ला, कालीकोट, प्युठान र अछाममा पनि घर भत्किएका छन् ।
भूकम्पका कारण जाजरकोटमा एक सय एक जना र रुकुम पश्चिममा ५३ जना गरी एक सय ५४ जनाको ज्यान गएको गृह मन्त्रालयले जनाएको छ । भूकम्पका कारण तीन सय ६३ जना घाइते भएका छन भने घाइतेहरूको देशका विभिन्न अस्पतालमा उपचार भइरहेको छ ।
