लामा पनि हुन्छन्
छोटा पनि हुन्छन्
दुब्ला पनि हुन्छन्
मोटा पनि हुन्छन्
आकारमा जस्ता भए पनि
महङ्गा वा सस्ता भए पनि
आखिर खुर्पा खुर्पा नै हुन्
समाजका खुर्पाहरू
होचा भए पनि
अग्ला भए पनि
अपाङ्ग भए पनि
सग्ला भए पनि
आखिर यिनको
गुण र धर्म एउटै हुन्छ
आखिर यिनको
आजीवन कर्म एउटै हुन्
विच्छेद गर्नु
शरीरको
नीतिनियमको
खुर्पाहरू
सिस्नोको तिखो काँडाझैँ धारिला हुन्छन्
धार भएकोमा घमण्ड गर्छन्
शैतानले झैँ उद्दण्ड रच्छन्
गाउँ गाउँमा चर्नु चर्छन्
बस्ती बस्तीमा सन्त्रास छर्छन्
काला कर्तुतमा गर्व गर्छन्
खुर्पाहरू
पातीजस्तै तीतो मन भएकाहरू
मनमा काउछाको वन भएकाहरू
बोलीले सिस्नोले झैँ पोल्नेहरू
समाजलाई जथाभावी गिजोल्नेहरू
समाजलाई जरैदेखि बिथोल्नेहरू
रातजस्तै कालो विचारका धनी
जति छन् यो सगरमनि
खुर्पाहरू
डा. श्यामप्रसाद न्यौपाने।
सुनवल –१२ नवलपरासी
यो समाचार पढेर हजुरले कस्तो महसुस गर्नुभएको छ ??
