बुटवल । नेपाल जेसीजको ५० औँ राष्ट्रिय महाधिवेशनका लागि देवदह जेसीजका संस्थापक अध्यक्ष बिजय गुरुङलाई नेपाल जेसीजको सन् २०२४ को राष्ट्रिय अध्यक्षमा अगाडि सारिएको छ । देवदह जेसीजले शनिबार देवदहमा गरेको राष्ट्रिय अध्यक्षका लागि उम्मेद्वारी सार्वजनिक कार्यक्रममा सहभागी भएका देवदहका जेसीस अगुवाहरुले सन् २०२४ को राष्ट्रिय अध्यक्षका लागि गुरुङ बाहेक अरुको विकल्प नभएको दावी गरेका हुन् ।
देवदह जेसीजका संस्थापक अध्यक्ष गुरुङ वर्ष २०१८ मा राष्ट्रिय उपाध्यक्ष, २०२० राष्ट्रिय कार्यकारणी उपाध्यक्ष र २०२१ मा राष्ट्रिय अध्यक्ष सल्लाहकार बनेको भन्दै अहिले राष्ट्रिय अध्यक्षका लागि तयार भएको उनीहरुले बताए ।
कार्यक्रममा देवदह नगरपालिकाका अध्यक्ष धुव्रप्रसाद खरेलले सामाजिक चेतना र विकासका लागि गुरुङले गरेका थुप्रै उदाहरणीय कार्यहरु भएकाले युवा क्षमता विकास र युवाको नेतृत्व, ब्यक्तित्व विकासका लागि गुरुङ एकमात्र उम्मेद्वार हुनुपर्ने धारणा राख्नुभयो । उहाँले गुरुङलाई नेपाल जेसीजमा विजयी बनाउन हरेकतर्फबाट सहयोग र सहकार्य गर्ने विश्वास ब्यक्त गर्नुभयो । यस्तै देवदहका पुर्व मेयर हिराबहादुर खत्रीले युवालाई अगाडि बढाउन र युवामा केही गर्नुपर्छ भन्ने चाहनाको विकास गराउन गुरुङमा धेरै योजना र भिजनहरु भएको बताउनुभयो । उहाँले गुरुङको राष्ट्रिय अध्यक्षका लागि दिइने उम्मेद्वारी जेसीसकै लागि महत्वपुर्ण भएको प्रतिकृया दिनुभयो ।
कार्यक्रममा लुम्विनी विकास कोषका कोषाध्यक्ष सिद्धिचरण भट्टराईले युवाका लागि केही गर्नुपर्छ भन्ने चाहना धेरै नै भएकाले रुपन्देही मात्र होईन समग्र लुम्बिनी प्रदेशका लागि गुरुङले दिने उम्मेद्वारी उत्तम भएको बताउनुभयो । त्यसैगरी राष्ट्रिय युवा संघ लुम्विनीका अध्यक्ष सुरज खरेलले आफ्नो संगठनबाट गुरुङको पक्षमा मतदान गर्न सबै सहयोग गरिने प्रतिवद्धता जनाउनुभयो । उहाँले गुरुङको जित यसक्षेत्रकै लागि गौरवको विषय भएकाले विजयी बनाउने कार्यमा सँगसँगै रहने बताउनुभयो ।
भलवाडी जेसिजका पुर्व अध्यक्ष, नेवि संघका नेता चिरञ्जीवि बस्यालले राष्ट्रिय अध्यक्षका लागि उम्मेदवारी दिएका गुरुङलाई कुनै पनि सर्तमा जिताउन सबैले गृहकार्य गर्नु पर्ने बताउनुभयो । कार्यक्रममा उम्मेद्वारी प्रमोशन कमिटीका प्रमुख सुरेन्द्र अधिकारीले युवासँगै सक्रिय, जुजारु र मित्रवत भावनाका भएकाले अहिलेको नेपाल जेसीजको नेतृत्व उनैलाई दिनुपर्ने माग सहित विचार राख्नुभयो ।
देवदह जेसीजका अध्यक्ष दुर्गा दहालको अध्यक्षता तथा महासचिव आनन्द पराजुलीको संचालनमा भएको राष्ट्रिय अध्यक्षका लागि उम्मेद्वारी सार्वजनिक कार्यक्रममा देवदह क्षेत्रका सामाजिक अगुवा, उद्योगी, ब्यवसायी तथा जेसीजका प्रतिनिधीहरुको सहभागिता रहेको थियो ।
बुटवल जेसीजको आतिथ्यतामा नेपाल जेसीजको ५० औँ राष्ट्रिय महाधिवेशन मंसिर २९ देखि पुस २ गतेसम्म बुटवल अन्तर्राष्ट्रिय सम्मेलन केन्द्रमा राष्ट्रिय महाधिवेशन हुने भएको हो । महाधिवेशनको तयारी तिब्र पारिएको कन्भेन्सन डाइरेक्टर तथा पूर्वअध्यक्ष जगतबहादुर पोखरेलले जानकारी दिनुभयो । महाधिवेशनमा गुरुङ सहित चार जनाले राष्ट्रिय अध्यक्षका लागि उम्मेदवारी दिने बताइएको छ ।
