देवदह । देवदह ६ मा फोहोर व्यवस्थापनका लागि वर्गीकरण अभियानको सुरुवात गरिएको छ। देवदह नगरपालिका वडा नं. ६ को आयोजनामा स्वच्छ,सुन्दर र सरसफाईयुक्त गाँउ अनि शहर हामी सबैको रहर भन्ने मुल नाराका साथ फोहोरको स्रोतमा नै बर्गीकरणका लागि घर दैलो अभियान शुभारम्भ गरिएको हो।
देवदह नगरपालिकाका प्रमुख प्रशासकिय अधिकृत कृष्ण प्रसाद सापकोटा, वडा नं. ६ का जन प्रतिनिधिहरु, टोल विकास संस्थाका पदाधिकारीहरु, आमा समुहका प्रतिनिधिहरु, विभिन्न संघ संस्था, नगर प्रहरी, वडाका कर्मचारीहरु र सरोकारवालाहरुको उपस्थितिमा सोमबारबाट अभियान सुरु भएको हो ।
घरदैलो कार्यक्रममा फोहोर बर्गीकरण गरिनुका साथै फोहोर बर्गीकरण सम्बन्धमा जानकारी समेत गराइएको थियो । फोहोर बर्गीकरण गर्ने हो भने आधा भन्दा बढी फोहोर कम हुने देवदह नगरपालिकाका प्रमुख प्रशासकिय अधिकृत कृष्ण प्रसाद सापकोटाले बताउनुभयो । त्यस्तै फोहोर बर्गीकरण गरि कुहिने फोहोर मल बनाउन सकिने र प्लाष्टीक जन्य फोहोर छुट्याइ बिक्री गर्न समेत सकिने देवदह नगरपालिका वडा नं. ६ का अध्यक्ष खेम बहादुर थापाले बताउनुभयो।
अभियानको सुरुवातमा अमरसिंह चोक,पिपलडाँडा,लक्ष्मीनगर, मिलनचोक लगायतको स्थानहरुमा घरदैलो कार्यक्रम गरिएको र बाँकी टोलहरुमा समेत अभियान चलाउने वडा अध्यक्ष थापाको भनाई रहेको थियो ।
