काठमाडौं— नेपाल बाल साहित्य समाजको नयाँ अध्यक्षमा विजयराज आचार्य निर्वाचित भएका छन्। शनिबार काठमाडौंको बागबजारमा सम्पन्न मतदानमा आचार्यले ४२ मत प्राप्त गर्दै अध्यक्ष बनेका हुन्। उनका प्रतिद्वन्द्वी डा. शशि थापा पण्डितले २७ मत पाइन्।
नयाँ कार्यसमिति चयन
महासचिवमा विष्णुकुमार खत्री (विष्णु केसी), सचिवमा भानु भट्टराई, चित्रकारतर्फ अर्पिता शाक्य, प्रकाशक तर्फ केशव पराजुली, र महिलातर्फ यशोदा अधिकारी निर्विरोध निर्वाचित भए। उपाध्यक्षमा विजयराज न्यौपाने (४० मत), कोषाध्यक्षमा डा. सीता सुवेदी पन्थी (४० मत) निर्वाचित भए। खुला सदस्यमा क्रान्ति पाण्डे (३७ मत) र समन श्रेष्ठ (४१ मत) विजयी भए।
विजयराज आचार्य को हुन्?
प्युठान ऐरावती गाउँपालिका-१ निवासी आचार्य नेपाली बाल साहित्यका स्थापित सर्जक हुन्। उनले १०० भन्दा बढी कृतिहरू लेखन, सम्पादन र अनुवाद गरिसकेका छन्। उनको पहिलो मौलिक कृति शान्तिको आत्मकथा विभिन्न भाषामा अनुवाद भइसकेको छ।
२०५८ सालमा कम्युनिस्ट विचारधाराका पुस्तक प्रकाशन गरेको आरोपमा पक्राउ परेका उनी तीन महिना हिरासतमा बसेका थिए। उनले सर्वोत्कृष्ट बालसाहित्य पुरस्कार (२०६०), पुष्कर गौतम बालसाहित्य पुरस्कार (२०६७), भूपेन्द्र स्मृति साहित्य पुरस्कार (२०८०) लगायत थुप्रै सम्मान प्राप्त गरेका छन्।
