काठमाण्डौ ।
बिहारको दरभंगामा ठुलो दुर्घटना भएको छ । जन्तीले पड्काएको पड्काका कारण एउटा घरमा आगो लाग्यो । यस घटनामा एकै परिवारको ६ जनाको मृत्यु भएको छ । सूचना पाउने बित्तिकै प्रहरी र अग्नि नियन्त्रण समूह घटनास्थलमा पुगेको थियो । यस मामिलामा प्रहरीले छानबिन गरिरहेको छ ।
जानकारीका अनुसार घटना दरभंगा जिल्लाको अलिनगर प्रखन्डको अन्टोर गाउँको हो । यस गाउँमा बिहे भइरहेको थियो । विवाहको कार्यक्रम चलिरहँदा पड्का पड्काइयो। तर पड्काको आगोले नजिकै रहेको घरमा आगो लाग्यो। घरमा राखिएको सिलिन्डरलाई आगोले भेटेपछि सिलिन्डर पड्कियो ।
अनि त आगो निभाउन झनै मुश्किल भयो । ढोका नजिक राखिएको डिजेलको ड्रम पड्किँदा स्थिति झनै भयावह बन्यो । हेर्दाहेर्दै पूरै घरमा आगोको लप्का देखियो । चारैतिर मान्छे चिच्याइरहेको आवाज आइरहेको थियो । घरको साथसाथै घरभित्रको सामान जलेर खरानी भयो । आगोमा परेर एकै परिवारको ६ जनाको मृत्यु भयो ।
