काठमाण्डौ//
नेपाल टी–२० क्रिकेट लिगको उपाधि लुम्बिनी अल स्टार्सले हातपारेको छ । आज बुधवार भएको फाइनल खेलमा विराटनगर सुपर किङ्ग्सलाई २४ रनले हराउँदै लुम्बिनीले उपाधि हातपारेकोे हो । लुम्बिनीले दिएको एक सय ३४ रनको लक्ष्य पछ्याएको विराटनगरले निर्धारित २० ओभरमा आठ विकेट गुमाएर एक सय नौ रनमात्रै बनाउन सक्यो । विराटनगरका अर्जुन साउदले ३४ र पृथु बाँस्कोटाले ३१ रन बनाए ।
लुम्बिनीका हरमीत सिंह र सागर ढकालले दुई÷दुई विकेट लिएका थिए। यसअघि त्रिवि क्रिकेट मैदानमा टस जितेर पहिले ब्याटिङ गरेको लुम्बिनीले १९ ओभर २ बलमा एक सय ३३ रन बनाउँदा अलआउट भयो । लुम्बिनीका लागि लाहिरु मिलन्थाले ४१ र हरमीत सिंहले ३० रन बनाए । विराटनगरका नन्दन यादव र राज नन्नानले दुई÷दुई विकेट लिए।
यो सँगै विजेता लुम्बिनीले ५५ लाख रुपैयाँ पुरस्कार पाएको छ । यस्तै उपविजेता विराटनगरले ३० लाख रुपैयाँ पुरस्कार प्राप्त गरेको छ । प्रतियोगितामा तेस्रो भएको जनकपुर रोयल्सले १० लाख र चौथो भएको काठमाण्डौ नाइट्सले पाँच लाख रुपैयाँ पुरस्कार प्राप्त गरेको छ । पहिलो संस्करणको नेपाल टी–२० क्रिकेट लिगमा लुम्बिनी अल स्टार्स, विराटनगर सुपर किङ्ग्स, जनकपुर रोयल्स, काठमाण्डौ नाइट्स, पोखरा एभेन्जर्स र फार वेस्ट युनाइटेड गरी छ टोलीको सहभागिता थियो ।
