देवदह । रुपन्देहीको देवदहमा देवदह कप २०८१ क्रिकेट प्रतियोगिता सुरु भएको छ । देवदह क्रिकेट क्लबको आयोजनामा देवदह क्रिकेट मैदानमा सुरु भएको प्रतियोगिताको उद्घाटन देवदह नगरपालिका वडा नं ७ का वडा अध्यक्ष कृष्ण प्रसाद अधिकारीले गर्नुभएको हो ।
उद्घाटन कार्यक्रमलाई सम्बोधन गर्दै वडा अध्यक्ष कृष्ण प्रसाद अधिकारीले पछिल्लो समय नेपालले क्रिकेटमा राम्रो प्रगति गर्दै आइरहेको र यस्ता प्रतियोगिताहरूले भविष्यमा उत्कृष्ट खेलाडी उत्पादन गर्न महत्वपूर्ण भूमिका खेल्ने बताउनुभयो ।
यसैबिच पहिलो दिन भएको उद्घाटन खेलमा न्यू होराईजन कलेजले विजय सुरुवात गरेको छ । न्यू होराईजन कलेजले वेस्टर्न क्रिकेट एकेडेमीलाई ५ विकेटले पराजित गरेको हो । पहिलो ब्याटिङ गरेको वेस्टर्न क्रिकेट एकेडेमीले ३५ ओभरको खेलमा अल आउट हुँदै १०८ रन बनाएको थियो। १०९ रनको लक्ष्य पाएको न्यु होराईजन कलेजले २७.२ ओभरमा ५ विकेट गुमाउँदै उक्त लक्ष्य पूरा गरेको हो। उक्त खेलको म्यान अफ दि म्याच न्यू होराईजनका विपर्शन केशी घोषित भएका थिए । उनले ४ ओभरमा १ मेडन सहित १४ रन खर्चेर ४ विकेट लिएका थिए ।
पुष २९ गतेदेखि माघ ६ गतेसम्म सञ्चालन हुने प्रतियोगितामा ६ टिम सहभागी छन् । प्रतियोगिताको बिजेता, उप विजेताले ट्रफी र मेडल प्राप्त गर्नेछन् । त्यस्तै बिधागत पुरस्कार समेत राखिएको खेल संयोजक संकेत भट्टराईले बताए ।
प्रतियोगिताको दोस्रो दिनको खेल भोली खुकुरी क्रिकेट क्लब र वेस्टर्न क्रिकेट एकेडेमी बिच बिहान ९ बजे देखि देवदह क्रिकेट मैदानमा हुने आयोजकले जनाएको छ ।
